МАДИНА МУМТОЗ: "БЕВАНИНГ КЎРГАН КУНИ ҚУРСИН”

Аввалига "Отахон” театри саҳнасида кўпчилик муҳлислар олқишига сазовор бўлган "Бевалар спектакли” энди янгича талқинда экран орқали намойиш этиладиган бўлди. Фильмда бош ролда сиз таниқли ва ёш истеъдодли актриса Мадина Мумтозни, унинг партнёри сифатида эса ҳар доимгидек Алишер Узоқовни кўришингиз мумкин. "Беванинг кўрган куни қурсин” дейди Мадина шамоллатиб қўйган томоғи бўғилиб. "Мен мана шу фильмда суратга тушиб, беваларга қай даражада оғир эканлигини юракдан ҳис қилдим”. "Бошидан ўтказган ва ўтказаётганларни эса гапирмасам ҳам бўлар” дейди у яна ачиниб.
ШАРОФ МУҚИМОВ ДАНГАСА БЎЛИБ ҚОЛДИ-МИ!?

Кундан кунга бирорта қўшиқ яратишга хоҳиши ёки имконияти бўлмаган хонандаларорасида шундоққина эски таронани қайта сайқаллаштириб, унинг "ремикс” вариантида куйлаш тоборо урфга кириб боряпди. Мана масалан, Шароф Муқимовни олайлик, аввалига ёниб ижод қилган, тез-тез янги тароналарни муҳлисларига тақдим этган шижоатли хонандага кўз тегди шекилли, ҳалигача бирор янги қўшиқ куйламади. Тўғри, хонандани бутунлай дангасалар сафига киритиб бўлмаса-да, аммо муҳлислар фикрича гапимизда жон бор. Шундай бўлса-да, ҳар ҳолда хонанда яқинда анча аввал куйлаган "Сен ҳаёлимсан” таронасини ремикс вариантини ёзди. Шундай экан, "Сен ҳаёлимсан” ремикси тез кунда эфир орқали жаранг сочади.

ДИҚҚАТ! ҲОСИЛАНИНГ ДЎППИСИ ҚИДИРИЛМОҚДА

Миллийлигимизни ноодатий намоён этадиган Ҳосила Раҳимова бу галги қўшиқ мавзусини дўппиларга бағишлади. Шавкат Абдураҳимов мусиқаси, Абдунаби Қодиров сўзи билан "Ака дўппинг тўлдирма” деб номланган бир оз ҳажвий ва миллий йўналишдаги қўшиқ аллақачон ёзиб бўлинган эди. Энди ана шу қўшиққа клип суратга олиш режалаштирилган. Бунинг учун қўшиқ сўзлари ва клип ғоясидан келиб чиққан режиссёр талабига биноан хонандамиз Республика бўйлаб дўппи қидириб йўлга тушди. Хонанда админстраторининг айтишича, клипдаги кадрларда камида олтмишта дўппи ўзини кўз-кўз қилармиш. Қойил-ей, мана буни ижод ва изланиш дебди...

ШИРИНСУҲАН ИРОДА МУҲЛИСЛАРИНИ СОҒИНГАН

Яқинда Туркияда Ўзбекистон Республикасининг 20 йиллигига бағишланиб ўтказилган концертда иштирок этган Ирода Дилроз шу кунларда композитор Жасур Абдураҳмонов мусиқаси билан янги қўшиқ ёзди. Қўшиқ номи эса ҳозирча сир. Асосийси, бу гал муҳлисларини қаттиқ соғинган Ирода Дилроз энди қўшиқларининг эфирлардаги рекламасини кучайтирмоқчи. Миллий ва замонавий эстрадамизга муносиб ҳисса қўшиб келаётган ширинсуҳан Ироданинг режалари ёмонмас. Фақат гап унинг амалга ошишида. Шундай эмасми?

КУЛГИЧИ БИЛАН КЎЗГА ЯҚИНМИШ

Муҳлисларнинг айтишича қараганда ўзининг миллий ва дилтортар тароналари билан кўнглимиздан жой олиб келаётган хонанда Умар Шамсиев экранда ўзининг иссиқ истараси, айниқса, кулгичи билан кўзга яқинмиш. Аммо, тан олиб айтиш керакки, дарҳақиқат, хонанданинг инсонийлик фазилатлари эътиборга молик. Тимур шеъри билан куйланган "Зинама-зина” янги таронасига ҳам режиссёр Наримон Султонхўжаев клип суратга олиб берди. Яқинда премьераси бўлиб ўтган ушбу таронани сиз "Марказ” телеканали орқали тинглаётган бўлишингиз мумкин. Хонанда декабр ойида чет эл сафарига кетишни мўлжаллаяпти.

ГУЛИ СУЙМАГАНГА СУЙКАЛМАЙДИ

"Бир ширин сўз борми?” таронаси ва клипи муҳлислар томонидан илиқ кутиб олинганидан сўнг хонанда Гули Асалхўжаева мутлақо ҳеч ким билмаган ва тингламаган "Севсанг севаман” таронасига қўл урди. Унинг ҳазил аралаш айтишича, ошиқ севмаса уни севишдан не фойда? Ўйлаб қарасак, бу гапда ҳам жон бор. Ахир суймаганга суйкалма дея бекорга айтишмаган-ку! Гули ушбу янги таронасига ишланадиган клипни ҳам айни кунда қиммат режиссёр дея эътироф этилаётган клипмейкер Баҳодир Маматуллаевга суратга олдириш эҳтимоли бор.