Телевизорда ҳар куни бир янги хонандани кўриб баъзида ўйлаб қоламан. Мен ҳам қўшиқ айтсаммикан?! Бинойидек овозим бор. Хонандалар тили билан айтгандай ўзимга яраша мухлислар орттирган бўлармидим?! Нима бўлганда ҳам орзуга айб йўқ дейишадику. Шундай қўшиқлар борки бир ҳафтага қолмай хитга айланиб улгуради. Ҳаттоки ёш болалар ҳам хиргойи қилишаётганини эшитиб қоламиз. Куй зўрми ёки қўшиқ матни. Шу ерга келганда ўйлаб ўйимга етолмайман. Лекин бир нарсани кашф этдим. Янги радио ихтиро қилдим. Унда фақат қалбингизни забт этган аслида ўғирланган қўшиқлар ижросини эшитишингиз мумкин. Бунақаси бўлмаган ҳали. Эшиттиришимизнинг номини "Ўғрини қароқчи урди” деб номладик.

Демак, эшиттиришни тинглашни бошладик. Ана мусиқа бошланди. Дарҳол танидингиз-а куй ўғирлаш бобида устоз сифатидан тан олинган Анвар Санаев эканлигини. Эй, ҳиндча дейсизми, туркча дейсизми бу хонандага "чепуха”. Бир пастда ўзбекчалаштириб олади. Мухлисларини кўриб яшшавор шаввоз деб юбораман-эй. Ахир у бутун бир бошли стадионни тўлдириб ташлашга қодир хонандалардан бирида. Эндиги навбат иккинчи қўшиққа. У ижро этилиши билан юрагингиз "жиз” этди-а. Ҳа топдингиз, баракалла кўчирмакашлик бобида иккинчи ўринда турувчи Мавлуда Асалхўжаеванинг ўзи. Мана эшитяпсизми, туркча оҳанглар қолиб, халиги борку, ҳинд киноси "Куёв қидирилмоқда” фильмидаги машҳур қўшиқ. Шуни ўзбекчалаштириб олибди. Эҳ, Мавлудахон қанийди шу ҳиндлар ҳам сизнинг қўшиқларингизни ўзлаштириб олишса эди. Ҳа, майли орзуга айб йўқ. Ҳали ҳаммаси олдинда. Лекин қойилмане, шу "родной” синглингиз Гули Асалхўжаева бору, туркларнинг куйини ўғирлаб "ишқ бу дилни алами” дея куйлаб чиқибди. Ана ўзи ҳам бошланиб қолди. Ёшлар смс орқали шўхроғидан бўлсин дейишмоқда. Уларнинг ҳам сазаси ўлмасин. Ёшларбоп бўлса ёшларбопида. Жаҳонгир билан Рухшонанинг "Чегаралар” номли қўшиғи сизлар учун тингланг. Лекин нима учун айнан шу қўшиқни бераётганимизни биласизми. Чунки у ҳам "Ўғирланганлар” қаторида турадида. Илк бора ўзим асл вариантини эшитиб қолиб, шу қўшиқдан ёмон кўнглим қолиб кетди-да, ўзиям. Ушбу қўшиқ аслида Эрон қўшиқчиси томонидан куйланган экан. Ҳаттоки Филиппжон Кирикоров ҳам шу куйда куйлаган. Келаси сафар смс юборсангиз албатта эшиттирамиз. Жилмайиши ёқимли Алишер Файзни айтмайсизми. Туппа-тузук кўринган шу бола ҳам "ўғри” бўлиб ўтирибди-я. "Алвидо” номли қўшиғини Юрий Шатуновнинг мусиқасини ўғирлаб яратган. Ишонмадингизми. Унда бир тинглаб кўринг. Ўзингиз гувоҳ бўласиз. Бизда смслар кўпайиб қолди. Биз албатта ҳамманинг талабини имкон қадар бажаришга ҳаракат қиламиз. "Учар қиз” фильмидаги машҳур саунтрекни ижро этган Нилуфар Усмонова ҳам ушбу оҳангни турк хонандаси Рафет Ел Романнинг "Yalandi salindini” қўшиғидан кўчириб олган. Айтдима бунча учар қизлаб қолишди, деб бировнинг қўшиғидан "учириб” олишган экан-да. Лекин қўшиқ ёшлар орасида анча оммалашди. Шу радио зорманда ёмонда ўзи. Ўзи билмаган ҳолда ўша қўшиқларнинг асл ижроларини (ё туркчасини, ё ҳиндчасини, ё озарбайжончасини ...) бериб қўйишади. Ана ундан кейин тингловчи ҳам иккиланиб қолади. Бу ўзимизникими ёки... ўғирланганмикин деган сўзга истиҳола қилиб туришади, бечорагина мухлислар.