КЎП РЕЖИССЁРЛАР ХУШЛАМАЙДИГАН ЗУЛФИҚОР МУСОҚОВГА ҲЕЧ КИМ КУТМАГАН ОМАД КУЛИБ БОҚДИ. БОШҚА ҲАМКАСБЛАРИ КАБИ ЧЎНТАГИНИ ЎЙЛАМАЙДИГАН РЕЖИССЁРНИНГ "ҚЎРҒОШИН"И "ОЛТИН ГЕПАРД"НИ ҚЎЛГА КИРИТГАЧ, ОЙНАИ ЖАҲОНДАГИ НАМОЙИШИГА ЙЎЛ ОЧИЛДИ! ЭНДИ АҚШ ЭЛЧИХОНАСИДА ФИЛЬМ ТАҚДИМОТИ ҲАМДА "ТИЛИ ҚАЛАМПИР" ИЖОДКОР БИЛАН ИЖОДИЙ УЧРАШУВ!

***

Зебо Наврўзованинг "Эрка куёв” фильми яқин кунларда! Бош ролда яна севимли ўғли Шохруххон! Муҳими, премьерадан кейин Наврўзова журналистларнинг танқидидан нақ балога қолмаса яхшийди. Ахир, унинг фильмларини жуда "хушлашади”да!

***



Аюб Шаҳобиддинов "Паризод” фильми устида тер тўкмоқда. "Кечиккан ҳаёт”га ўхшаган антиқа фильм бўлса, ишламай қўйгани ҳам маъқул! ) Танқид бўлса бор гап: айрим "аҳмоқона лавҳалар борки, чиройли картинани бадбашара қилиб қўйган. Бир овлоқ қишлоққа келган шаҳарлик келиннинг яширинча сигарета тутатиши (Дилноза Кубаева яратган образ) яна кутилмаган ғалати лавҳалар...Хуллас, Ёлқин Тўйчиевни "гений” сифатида кўришни бас қилиб, сценарийга ўзингизнинг "ақлли” қарашларингиз билан ўзгартириш киритсангиз, хўб савоб ҳам қилардингиз, Шаҳобиддинов!

***

Қанақа режиссёр бўлишни қариндоши ва устози бўлмиш Рустам Садиевга кўрсатиб қўйган Акбар Бектурдиевнинг янги фильмидаги жуфтлик: Адиз Ражабов ва Зарина Низомитдинова. Фильм номи ҳам ажойиб: "Салом севги, хайр севги”. Бу кетишда Болливиднинг изига из, тизига тиз бўлишимиз аниқ! ) Муҳими, келинлар мавзусига ёпишиб қолган, ижоди хонтахтага айланган Рустам Саъдиев жиянидан кўп нарса ўрганса арзийди. Сал бош эгилса эгилибди-да…Барибир буни мухлислар пайқамайди. Профессионаллик эса ёш ва бошга бир-икки марта қўнган омад билан ўлчанмайди...Тушунарли бўлгандир, а?

***



Жаҳонгир Позилжонов "Илтимос, менга қаранг”да! Позилжоновдан яна нима кутиш мумкин? Бачканалик дейсиз-у, бироқ, сизга бачкана бўлиб кўринган ана шу ижоднинг ошиқлари бир талай. Тўйда ҳам, концертда ҳам, кинода ҳам...Қойил қолмасдан илож йўқ. Ё шунчаки ёқса-ёқмаса кузатар экансиз, "Божалар”ни олқишлаётган минглаб мухлислар бор. Ана шулар учун ҳам "Андижонлик меҳмон”да кўрганингиз каби Позилжонов сочини калга олдиришдан ҳам тоймайди! Мухлисларига садоқатли.

***



Сўнгги пайтда катта шов-шувлар гирдобида қолиб кетган Фаррух Сойипов яна мухлисларини ҳайратга солиш арафасида. Актёрнинг яқин дўстларидан бирининг айтишича, Сойипов кинони бир муддатга (ё бутунлай тарк этиб), қўшиқ дунёси орқали карьерасини давом эттиришни режалаштиряпти. Фаррух инглиз, француз, рус ва ўзбек тилларида куйлаб, кўпчиликнинг диққатини ўзига қарата олган истеъдодлардан. Балки, ҳақиқатан ҳам омад қуши қўшиқ йўлларида кутиб тургандир? Дарвоқе, "Нафс” фильмига келсак, картина продюсери Аваз Тожихоновнинг айтишича, оммавий намойиш декабр ойларида бошлаб юборилади. Ҳозирча, фильм атрофидаги гап-сўзларнинг тинчишини кутмоқ керак! Балки, шайтоний ҳирсга тўла фильмни ҳозирча шошмаслик керакдир?! Ахир, энг аввало, ёшлар тарбияси турибди! Экранга келсак, шунлоғам, "Панорама”нинг "юз”и бўлар-бўлмас, тутуруқсиз картиналардан бўшамаяпти!