17:58 Ногиронлик нафақаси кимларга тайинланади? | |
Меҳнатга лаёқатсиз фуқароларга ҳар ойлик нафақалар тайинлаш ва тўлаш тартиби ҳақида таҳририятимизга келган бир қанча мурожаатлар ушбу мавзуга қўл уришимизга сабаб бўлди... Бугун республикамизда 3 турдаги нафақа мавжуд бўлиб, улар: * ёшга доир; * ногиронлик (болаликдан ногиронлардан ташқари); * боқувчисини йўқотганлик нафақалари Вазирлар Маҳкамасининг бир қатор Қарорлари асосида тайинланади ва тўланади. — Эрим 3-гуруҳ ногирони. Бир неча ойдан бери ногиронлик нафақасини сўраб бормаган жойим қолмади. Ногиронлик нафақалари аслида кимларга тайинланади? Шунга аниқлик киритсангиз? Бозоргул Дуйсенгалиева, Қорақалпоғистон Республикаси — Ногиронлик нафақаси ногиронлик содир бўлган ҳолларда, меҳнат қобилияти доимий ёки узоқ муддатга йўқотилгандагина тайинланади. Ёшидан қатъи назар, ишламайдиган, фақат 1 ва 2 гуруҳ ногиронларига тўланади. Пенсия тайинлаш учун етарлича иш стажига эга бўлмаган I ва II гуруҳ ногиронларига ногиронлик пенсияси бор стажга мутаносиб миқдорда тайинланади. Ишлайдиган ва бошқа ҳақ тўланадиган даромад манбаига эга бўлган 1 ва 2 гуруҳ ногиронларига (алиментлар ёки стипендиялар бундан мустасно) ногиронлик нафақаси тайинланмайди. Ногиронлик нафақаси меҳнатга лаёқат йўқотилишининг бутун даври учун тайинланади. — Кишининг меҳнатга лаёқатсиз эканлиги қандай аниқланади? Акбар Самадов, Тошкент шаҳри — Меҳнат қилишга лаёқатсизлик даражасини (бу лаёқат доимий ёки узоқ муддатга йўқотилганда) ҳудудий Пенсия жамғармалари томонидан бериладиган йўлланмалар асосида тиббий-меҳнат эксперт комиссиялари аниқлайдилар. Меҳнат қилишга лаёқатсиз ёки ишлаш мумкин эмаслиги аниқланганда, комиссия тегишли хулоса чиқаради. Комиссия қабул қилган хулоса асосида тузилган тиббий текшириш далолатномасидан кўчирмани 7 кун муддат ичида Пенсия жамғармаси бўлимига жўнатади. Меҳнатга лаёқатсизлик пенсияга чиқмасдан аввал содир бўлса, ногиронлик бўйича пенсия белгиланади. Меҳнатга лаёқатсизлик ёки соғликни йўқотганлик даражасига кўра ногиронлик уч гуруҳга тиббий-меҳнат эксперт комиссияси томонидан ажратилади. — Нафақа олиш учун мурожаат қилишда қандайдир муддатлар белгиланганми? Баҳодир Кенжаев, Навоий вилояти — Нафақа олиш ҳуқуқига эга бўлганлар ушбу ҳуқуқ пайдо бўлгандан сўнг бирор бир муддат билан чеклашсиз, исталган вақтда ўзи яшаётган ҳудуддаги пенсия жамғармасига мурожаат қилишлари мумкин. — Нафақа олиш учун қаерга мурожаат қилинади? Қандай ҳужжатлар тайёрланади? Рустам Бердиев, Наманган шаҳри — Нафақа тайинлаш тўғрисидаги ариза билан ўзингиз яшайдиган ҳудуддаги Пенсия жамғармасига мурожаат этишингиз мумкин. Аризага: * паспорт ёки туғилганлик ҳақидаги гувоҳнома нусхаси; * маҳалла фуқаролар йиғинидан яшаш жойи, ўзи ва оила аъзолари ҳақида тўлиқ кўрсатилган маълумотнома; * боқувчисини йўқотганлик нафақаси тайинлашда боқувчининг вафот этганлиги тўғрисидаги гувоҳнома ва нафақа олиш ҳуқуқига эга бўлган оила аъзоларининг паспорти ёки туғилганлик тўғрисидаги гувоҳномалари нусхалари; * ногиронлик гуруҳини аниқлаш учун тиббий-меҳнат эксперт комиссиясининг тиббий текшириш далолатномасидан кўчирма илова қилинади. "ДАРАКЧИ” маълумотномаси Ўзбекистонда кейинги ўн йил ичида: * ногиронлар сони 1,2 баробар, болаликдан туғма ногиронлар 1,5 баробар, биринчи марта ногирон деб топилганлар сони 2 баробарга камайди; * аҳолининг ўртача умр кўриши 67 ёшдан 73 ёшга узайди; * муҳтож ногиронларни протез-ортопедия маҳсулотлари ва реабилитация техник воситалари билан тўлиқ таъминлашга эришилди. Саволларга Ўзбекистон Республикаси Молия вазирлиги ҳузуридаги бюджетдан ташқари пенсия жамғармаси Тошкент шаҳар бошқармаси бош мутахассиси Абдурашид Исмоилов жавоб берди. | |
Категория: Новости | Просмотров: 1516 | |
Всего комментариев: 0 | |