"Қувноқлар ва зукколар” жамоалари ўзининг саҳнавий чиқишлари орқали еттидан етмишгача бўлган томошабинлар кўнглини топа билди. Балки талабалар томонидан тайёрланаётган бу чиқишларни кулгу усталариники билан солиштириб бўлмас. Бироқ улар ёш бўлишларига қарамай томошабинни бачкана кулгудан қутқаришга ҳаракат қилишяпти. 28 октябр куни ўзининг навбатдаги яккахон концерт дастурини тақдим этаётган "Дизайн” жамоаси билан шулар ҳақида фикрлашамиз.

— Аввалари "ҚВЗ” жамоаларининг чиқишларига шунчаки талабалар ҳаётидаги ҳангомалардек қараларди. Бугун эса бунинг аксига гувоҳ бўляпмиз. Аслида бу йўналишда ижод қилишдан мақсад нима эди?

Дилшодбек Мусабеков: — Жамоамиз учун бу биринчи навбатда завқ. Ҳеч биримиз саҳнага мақсад ёки манфаат истаб чиқмаганмиз. Шунчаки саҳнадан туриб одамлар табассумини кўрмоқчи бўлдик, холос. Бу иш кун келиб ҳар биримиз учун ҳаётимиз бўлагига айланиб қолишини ўйламагандик ҳам.

Абдураҳмон Мавлонов: — Гуруҳимиздаги ҳамманинг ўз иши бор. Турли соҳа вакилларимиз. Санъат эса бизни бир ерда, бир мақсад йўлида бирлаштирди. Бу ҳам бўлса одамлар юзига табассум улашиш. Бугун бўш қолдик дегунча одамлар орасидан, кўча-кўйдан янги бир ҳангома ахтаришга уринамиз.

— Шунчаки бошланган ишнинг самараси ёмон эмас. Ҳар ҳолда бугун анчагина томошабинлар сизларни таниб қолишган.

Қобилжон Каримбердиев: — Шунчаки бошланган иш деб бироз адашдингиз назаримда. Бу ишга ҳаммамиз меҳр билан киришганмиз. Агар сиз айтгандлек "шунчаки" ишлаганимизда бугун балки сиз билан ҳам суҳбатлашмаётган бўлармидик?! Ютуқларга келадиган бўлсак, энг муҳими, саҳнада айтаётган гапларимизни китобдан ёки кинодан қидирмаяпмиз. Одамлар орасида юриб, уларнинг кундалик қизиқ гапларини ўзларига кўрсатиб беряпмиз, холос.

Д.М.: — Қобилжоннинг фикрига қўшиламан. Аввало, айтишимиз керак бўлган ҳангомадан ўзимиз таъсирланиб, ўзимиз кула олишимиз керак. Ана ўшандагина у томошабинга тушунарли бўлади. Муҳими, қалтис ҳазил билан саҳнада ўтирган минглаб томошабинларнинг ишончини синдириб, ранжитиб қўймаслик.

— Кўпчилик томошабинларнинг сизни ёмон кўришларидан ҳам хабарингиз бордир?!

Д.М. — (Кўзларини катта очиб). Нимани назарда тутаётганингизни пайқадим. ”Тошкент” телеканалидаги "Нима учун” кўрсатувида бир неча йиллардан буён иштирок этиб асосан, салбий қахрамонлар образини яратганим учун томошабинлар, айниқса, катта ёшли онахонларимиз мени ёмон кўриб қолишган. Лекин мен ўзимга топширилган ишни аъло даражада бажараман, деб жон жаҳдим билан киришиб ўйнаган ролларим ўзимга ёмон таъсир қилиши ҳақида ўйлаб кўрмаган эканман.

— Бугунги томошабиннинг фикрлаш доираси кечагидан кўра анчайин кенгайган. Демакки, саҳнадан туриб айтилаётган гап ҳам унинг савиясидан келиб чиққан ҳолда бўлиши лозим.

Қ.К. — Јоялар кўп. Аммо концертга дам олишга келган одамларни қийнашни истамаймиз. "ҚВЗ"ининг концерт дастурларига куламан. деб келган одамларнинг аксарияти фикрлашни, мајзини чақишни истамайди. Шу сабаб биз ҳам осон йўлни тутамиз. Тушуниш мураккаб, фикрлашга ундайдиган саҳна кўринишларини "Тошкент” телеканалида эфирга бериладиган "Кулгу бекати” номли кўрсатувимизда кўрсатамиз.

— Бачканалик ҳақида қандай фикрдасиз? Бугун сизларнинг репертуарингизда ҳам буни кўриш мумкин.

Саъдулла Фатхуллаев: — Биласизми, бир пайтлар қизиқчиларимизга бачкана деган тамја босилганига гувоҳ бўлганмиз. Кун келиб шу ҳодиса ўзимизда ҳам бўлиши мумкинлиги ҳақида ўйлаб кўрмаган эканмиз. Ўзбекнинг ўзи қизиқ, ўзидан гапи қизиқ, дейишади-ку. Шундай сўзлар борки, уларнинг бир неча хил маъноси бор. Баъзан саҳнада қочирим қилиш учун сўзларни бошқа маъноларда ҳам ишлатишга ҳаракат қиламиз. Лекин ҳаммаси меъёрида. Бугун бу йўналишда тажрибамиз анчайин ошган. Шу сабаб асосий эътиборни маънавий озуқага қаратяпмиз.

— Миллийлик тушунчаси-чи? Сўнги пайтлардан ҳангома экан, деб миллий қадриятларимизга зид саҳна кўринишлари билан чиқаётган жамоалар ҳам йўқ эмас.

Д.М. — Бошқаларнинг айбини айтиш фикридан йироқмиз. Чунки иш бор жойда камчилик ҳам бўлади. Бу йилги концертимизда эса сиз айтган миллийлик тушунчасига алоҳида эътибор қаратганмиз. Кун сайин унутилиб бораётган аския, пайров жанрларида ҳам янги репертуарлар тайёрлаганмиз. Ахир бу ўзбек кулги санъатининг ўзаги-ку.

— Эшитишимизча, "ҚВЗ"дан ажралиб чиқиб кетганмишсиз.

Д.М. — Назаримда алоҳида ишлаш ва эркин ижод қилиш мавриди келди. Шу сабаб алоҳида чиқиб кетишга қарор қилдик. Аммо нима бўлган тақдирда ҳам бизни танилишимиз, саҳнага юз тутишимизда ва бугунгидек яккахон концертимизни қўйишимизда "ҚВЗ"нинг ўрни катта.